L'altra Venezia - The Other Venice

Discussion 19 posts |  Only members can post. Join?

About L'altra Venezia - The Other Venice

E ti te trovi drento a 'sto silenzio
cussì de colpo che gnanca ti te inacòrzi,
'lora ti te senti intortigià, invis'cià, ingarbugià,
sborìo, parchè ela la zé cussì bela, scamofiòsa,
santa, bagassa, ladra, slodra, diavolessa,
la te sbàte in tel muso tanta de quela belezza
che se a volte la par soràda la te ciàpa
par e cane de la gola, la te fa mancar el fià,
colpi al cuor come che fusse el primo Amor...
La te s'ciafìsa, slèpe, pastèchi fin a farte i oci
tuti macài e l'ànema scominzìa a desfàrse
cofà 'na sculieràda de miel, el sarvèlo
te va in papa squasi da sentìrte mal...
Maledèta, malignàza, càncara,
che ti te tol bàgia de i me sentimenti,
che ti te làssi tocàr, tamussàr, palpugnàr,
co e colonète, passamàn cussì lustri
tanto da parer vero bufà de Muran, oro fin,
in lastra, massìzzo, e ti me resti inpegolàda
su la polpa de i déi, 'lora mi te pizzègo,
te toco, te sfiòro, te carèzzo, te dago frignòcole,
te meto e man 'dòsso, slargo i brazzi tanto
che rièsso a tocar i do muri de la cale,
te toco le piere rozegàe da'l Tenpo, gràto
e malte che se desfarìna, te zàpego, alzo e man
fin a tocar el sofìto de'l sotopòrtego,
verzo i brazzi par sìnger la vera da pozzo
e dopo cofà putèo ghe bato sora cofà tanburo,
serco de carezzàr quela gata in Amor che
se ruzza torno a la fontàna che cròcola,
Dio come che ti me ga redùto ma so cussì
contento de 'sta scùfia, de 'sto rebaltamènto,
de 'sto novo AMOR,
mato, strànbo, fora de'l vàda, 'nosènte, pecaminòso...

Grazie Venezia mia!!!
[Gianni Vivian]